كل العالم طلعت قالت

أطلع بره ياعم شفيق

مش عايزين الاعيب وملاوعه

والوقت أتغير يا فريق

بص في ساعتك كدا وأتأكد

الثورة قامت يا عنيد

,,,,,

والمسئول واقف يتفرج

والشعب بيغلي ويشيط

شيلو الناس الوقت أتغير

الموضوع سهل وبسيط

ولا الحكاية فيها أنه

ماتقولي يادفعه يا حويط

ماسك السلطة بأسم الشعب

والشعب م الفعل بعيد

دم الشهدا أيه أخباره

ماسمعناش عن أي جديد

المصري مين يطفي ناره

والقاتل عايش وسعيد

يالا يا قأئد أنجز خلص

عايزين أي قرار مفيد

دا الفاسد عمال بيدور

علي حد قريب م البيت

يديله رخصه وتأشيره

علشان يرجع تاني يظيط

ساعتها الدم هايرجع

والسقف هينزل بالبيت

شفيق ياراجل قوم شيله

وأسمع صوت الشعب أكيد

مش أنتا الحارس للثورة

والا أنتا ريس جديد ؟

.............
فبراير 2011
امام سليم امام

تسوي أيه الدنيا لما

تنتهي بشنطة رحيل

ممنوع يكون فيها غنوة

تهزم الليل الطويل

مليانه حيره ومعني باهت

لعمر عاش يقتل سنين

كانت بياض الصورة فيها

أكبر دليل علي معني خير

دارت خطاوي الخوف تدنس

كل شئ فيها جميل

صبحت ايادي الليل تدمر

لحد ماتاه الدليل

والصورة راحت مع الي راح

مع كل معني كان يوم جميل

ممنوع ياراحل م الحياة

حفنة تراب تساوي أيه

شمس الأصيل تشوفها ليه

شارع بيدن بالأمان

ممنوع عليك تحضن أمانه

وجرس كنيسه مليان حنان

تقدر تقولي فين مكانه

فرحة بلادي وحزنها

حاجات كتير خسرتها

ماتت معاك يوم الرحيل

ملهاش مكان وسط الظلام

والظلم المرسوم ع الجبين

عاشت ايادي الناس ياراحل

ترسم حياة في كل يوم

وتقول حكاية لكل جيل

عن حد باع حضن الوطن

وأشتري شنطة رحيل

فبراير 2011
‏_‏

هي ثورة
.....
هي ثورة قومنا بيها
ضد كل المفسدين

ابتسامة فجر طالعة
وسط أشواك الأنين

ميلاد جديد لأقوي أمه
كانت غايبه من سنين

مصر يا شجرة حياتنا
أحنا أوراق الربيع
مهما طال ليل سكتنا
أحنا حصنك المنيع

قادرين نكون في أي وقت
بركان دمار علي كل خاين
والمصري قالها أنا جد فقت
وكل شيء فداكي هاين

ولايوم يا مصر هاكون أسير
لظلم ظالم مهما كان

الكل بان يا مصر بان
وعرفنا الخاين والجبان
ومهما قالوا علينا أحنا
حلمنا هوا الأمان

ظلم البشر عارفين مصيره
والحق بان الحق بان

ها تعيشي يا مصر
ها تعيشي حره
وكل خاين ليكي بره
مالوش مكان وسطنا

دا في كل حاره ألف ثاير
علي أي حد يخون يا مصر
وكل شىء فداكي هاين
وبكره جاي بألف نصر

أوعي تنسي يا مصر أوعي
دم أبنك الشهيد
اللي ضحي يوم عشانك
أوعي تنسي الوليد

اللي كان حارس أمانك
وقت ما باع الخسيس

مصر أغلي م الأسامي
والمعاني والكلام
مصر قادره تكون بدايه
ليوم جديد كله سلام

ابتسامة مصر غالية
أغلي من كل الحياة
يا حبيبة عمري لسه
الحياة طالبه حياه

البدايه بكره أيوه
البدايه لكل شيء
كان زمان في حياتنا غنوة
حلمنا شاف الطريق

كان سنين تايه حزين
بيسأل يناس طريقي فين
حوشوا عني المفسدين
أفتحولي الطريق
عايز الحق نور جديد

سيبوا ولادي سيبوهم
يرسموا ليا الطريق
ليه بشده بتحوشوهم
دول بدايه لنور جديد

ألف سلامه يا مصر ليكي
بكره أحسن م اللي فات
والحياة يا مصر فيكي
هتكون أمان الظلم مات

يا مصر قادره والله قادره
تخطي أي مستحيل
وابتسامتك يا مصر واجب
نعدي بيها لألف جيل

واقفين يامصر في كل شارع
نحمي ظهرك م الخسيس
اللي خان واجب أمانك
اللي باعك بالرخيص

واقفين يا مصر في ادينا قوة
عمرها آلاف سنين

م النها ردة بكره أحلي
وشبابك فتحوا الطريق
لكل خير يا مصر بكره
ابتسامتك نور كبير

أقوي من كل الصعاب
ابتسامتك يا مصر حره
تراث قديم في توب شباب
.............
كتبها : امام سليم امام
يناير 2011
عاشت الثورة المصرية