معصية الألم
.................

بكتب حروف قلبي وبرسمها

وردة

ونجمة

وكلمة بتنادي

علي حلم جوايا بيهزمها

بالحزن

والخوف

والألم بادي

المعصية في الكلمة بكتبها

تصرخ

تبوح

بالحزن وتهادي

في كل حرف جريح بيقتلها

والحيرة

واجب

والألم عادي
.......
امام سليم امام

قال الشهيد
سألت الجموع .. بتهتف لمين
لمصر الحبيبة
لبكرة الجميل
لعوده سريعة
لروح الحياة
لحب يجمع
عيون العباد

لحضن يطمن

قلوب الولاد

لطله جديدة

لشمس الاصيل

تنور سمانا

ونكون فرحانين


...................

قالوا الحقيقة في صوت الجموع

مشاكل عديده

من فقر لجوع

لحبة مناصب

وخوف م الرجوع

لقلة قليلة من المسؤولين

في تقسيم غنيمة

أتنهبت سنين

وحط عليهم

كنيسة وجامع

وسبحة وصليب

في شارع بلادي

واقفين مهزومين

قصاد الحقيقة

الأبية العصية

العايشه معانا

بطول السنين


" الدين طول عمره مصري وأحنا مصريين "


وجندي محتار في كل اتجاه

بيسمع في صوت بيحاول ينساه

الشعب يريد أسقاط الحياة

وشباب بيهتف للحق وللحياة

بيحلم ببكرة وبسمة يوم جديد

محتاجة لهمة وبصمة كل ايد

بينادي_أخويا_أرجع _ تاني _ فوق

هات اديك وحطم الفروق

قوم _شوف_بلدنا خسرت كام شهيد

وواجب علينا نكون شيء مفيد

ونملا وطنا بالحب وبالأمان

أخويا حياتك حياتي وكل ايد

هاتبني لبكره فداءا للشهيد


.......مارس 2011........

امام سليم امام

بنوتة حلوة صغيرة

بسمة عيونها محيره

كل العيون

في أديها شنطة ومسطرة

وقلم بيهتف بالحياة

وكتاب جميل أسمة الوطن

حلم الحياة

بتغني غنوة لمعني تاه

وسط الزحام

غنوة حياة

وتقول بصوت مليان شجن


" أمسح دموعي بالأمل

وأرسم معايا يوم جديد

مصر الجميلة الطيبه

محتاجة بكره لكل أيد

ترسم وطن مليان أمان

ترسم حياة بتوب جديد"


البنت سجدت للوطن

لحظة ميلاد أسمها

بالفطرة كان حبها

حكايتها سهله قريبه

لكل نفس طيبه

تسمها تنزل دمعتك

لما تقول

أخويا كان بيشدني

علشان أعيش

ويروح يقايض حلمه البريء

بنفسة الجميلة الطيبه

قالوا عليا أخت الشهيد

والدنيا لابسه توب جديد

فرحانه بوجودها الأمين

وسط ولادها المنصورين

الفرحانين بحضنها

وأخويا فرحان وسطهم

حاسه بكلامة وضحكتة

وبصوت غناه ورقته

لما يقول حضن الوطن

يشبه حلاوة ضحكتي

أخويا كان بيحبني

أكتر كتير من أي حد

وعشان أكمل فرحتة

هارسم أمل

في كل صفحات الوطن

وامشي وأكمل الطريق

وأنصر حبيبي البريء

هوا وشباب ضحوا عشانا

بكل شيء

وبدمهم فتحوا الطريق

لبكره يجي بالأمل

أرتاح يا أخويا وأبتسم

حلمك كفاح واجب عليا

مهما يطول بيا الزمن

......مارس 2011.......

بقلم / امام سليم امام