الاستاذ
.....
الاستاذ واقف بينظر
وبيكتب في كلام وكلام
مره يهاجم مره يفسر
وبيكدب والكدب حلال
الاستاذ مش عاجبه الحال
وناوي يألف ميت موال
قبل ما يسمع تلاقيه فاهم
الأستاذ مفتي الأجيال
يسأل مره وحيده يجاوب
علي نفسه من غير افعال
تستفسر عن سر جنابه
ومنين جايب طولة البال
يتحرر من كل كلامه
بسؤال ملضوم بسؤال
الاستاذ بس بيتكلم
والباقي يسمع وينام
تيجي تناقش مره تسلم
علي نفسك تلاقيك دجال
متخلف واقف يتكلم
في حضرة عالم أوزان
مش عايز تفهم تتعلم
وهاتفضل تلميذ خيبان
الأستاذ عايش أستاذ
يتكلم من غير ألوان
ويحفظ نهج الاموات
ويأسس تلميذ تعبان
بيردد التعلب فات
والتعلب سابقه بأجيال
أوزن أحسب أجمع شيل
أسمك سنك هدفك أيه ؟
أتخرج وأكون أستاذ
يتكلم والكل ينام
وأن قام حد يناقش
هارميه وهاقول خيبان
مش واعي سر الحكمه
بيفكر قبل الأوان
.....
امام سليم امام
