الصف الثاني
لو ماحكمش بلدنا شباب
قول للثورة مفيش تغير
التغير في الأصل شباب
وأسأل ميادين التحرير
...............
مصر بلدنا لازم تتحرر
فوق الراس رأيك يا كبير
لكن هاتلي وطن أتغير
بنفس المنهج والتفكير
...............
هي الدنيا خـريف وربيع
والجذع لو شـاخ ينـكـسر
والحمل طول عمره كبير
والكل شـاف اللي حصل
...............
مش عايزين من تاني نلوش
ونجيب حد علينا يكوش
ويأنتخ ع الكرسي الجلد
ويقولنا بكره لأ بعده
من تحت الخمسين هانعد
...............
مصر بلدنا لازم تتمرن
وتلعب جري وجمباز
وتفك كده وتتحرك
وتصلح كل اللي باظ
...............
وتبطل بقي لعب اليوجا
اللي جابتنا لسابع أرض
دي بلدنا مليانه شباب
أخضر طازة وزى الورد
...............
علي راسي والله يا كبير
مقدرلك كل المشاوير
وتاريخك يشهد أنك
كنت في وقتك حد خطير
...............
لكن وقتك كتر وطال
والوضع صبح مقلوب
فلازم نعدل تاني الحال
وناخد مكانا المنهوب
...............
الصف الثاني ليكم
والأول طول عمره بتاعنا
أحنا شباب بيكم
والحلم في الأصل بتاعنا
...............
وطريق التغير طويل
وهياخد سنين كتيرة
سيب الدفه بقي يا كبير
علشان أحلامنا تلاقينا
...............
لو ماحكمش بلدنا شباب
قول للثورة مفيش تغير
التغير في الأصل شباب
وأسأل ميادين التحرير
...............
29/5/2011
امام سليم امام
