الصف الثاني
....
لو ما حكمش بلدنا شباب
قول للثورة مفيش تغيير
التغيير في الأصل شباب
واسأل ميادين التحرير
---
مصر بلدنا لازم تتحرر
فوق الراس رأيك يا كبير
لكن هاتلي وطن يتغير
بنفس المنهج والتفكير
---
هي الدنيا خريف وربيع
والجذع لو شاخ ينكسر
والحمل طول عمره كبير
والكل شاف اللي حصل
---
مش عايزين من تاني نلوش
ونجيب حد علينا يكوش
ويأنتخ ع الكرسي الجلد
ويقولنا: "بكره… لأ بعده"
من تحت الخمسين هانعد
---
مصر بلدنا لازم تتمرن
وتلعب جري وجمباز
وتفك كده وتتحرك
وتصلح كل اللي باظ
---
وتبطل بقى لعب اليوجا
اللي جابتنا لسابع أرض
دي بلدنا مليانة شباب
أخضر طازة وزي الورد
---
علي راسي والله يا كبير
مقدّرلك كل المشاوير
وتاريخك يشهد إنك
كنت في وقتك حد خطير
---
لكن وقتك كتر وطال
والوضع صبح مقلوب
فلازم نعدل تاني الحال
وناخد مكانا المنهوب
---
الصف الثاني ليكم
والأول طول عمره بتاعنا
أحنا شباب بيكم
والحلم في الأصل بتاعنا
---
وطريق التغيير طويل
وهيـاخد سنين كتيرة
سيب الدفّة بقى يا كبير
علشان أحلامنا تلاقينا
---
لو ما حكمش بلدنا شباب
قول للثورة مفيش تغيير
التغيير في الأصل شباب
واسأل ميادين التحرير
---
✍️ إمام سليم إمام
– 29 / 5 / 2011
