قالوا مصر بلد الحرية
بلد العدل والديمقراطية
بلد تقول فيها رأيك بصراحة
بس قولة من غير سب ولا وقاحة
واتكلم محدش هيقولك بتقول إيه
اتكلم ما تخفش يا سعادة البيه
انتهى عصر سلب الحرية
والبلد بتشر ديمقراطية
والكلام بقى بدون رقابة
المهم تلتزم بميثاق النقابة
جبت الورقة والقلم وبدأت في الكتابة
صرخ القلم ما بين إيديا
صرخ وقال: ارحمني يا ابن المفترية
أنا مالي أنا بالغلابة
وقسوة الديابة
أنا مالي إنكم عايشين في غابة
يا عم اكتب قصيدة رومانسية
أو حتى قصة عاطفية
ولا أقولك…
ارميني على المكتب
وروح اتفرج على الدراما التركية
يمكن تنسى شوارع بلدك المصدية
والميكروباص وطابور العيش
يا عم اتفرج وعيش
بلا مقالات
بلا مظاهرات
بلا شعارات
بلا كلام فارغ
دي دنيا ما تسويش
دمعة واحدة من عيونك
على شعب بيخاف
من مرات خلف الشويش
٠٠٠٠٠
✍️ إمام سليم إمام
