رقاصة بلدي ترقص

في البلاد كلها

شايلة هموم الكون

ناسيه يناس همها

تضحك بصوت مسموع

والضحك طوالي

مليان بكا ودموع

علي كل شيء غالي

قالو عليها كلام

وكلامها متداري

ومنين تجيب القول

والخوف جبل عالي

الحظ لم ينكسف

ويحس بوجودها

ضحك عليها كتير

وساومها بحدودها

كل العيون تطلبها

وعيونها ترفضها

فرحتها فرحة ندم

وسكاتها باب مفتوح

لكل صاحب ألم

يجري عليه ويروح

يشرب هوا فرحها

يسرق حنين قلبها

ويكون ناصيبها سم

يجري قوام في عروقها

يقتلها يحرمها

من لون حياه ممكنه

تتبدل الامكنه

والكل يشبهها

يعرض شرور مبهرة

لجل الأمل ينطال

ويروح يلاقي شىء

فوق النصيب منصوب

واقف بقلب جرىء

يرجع حزين مغلوب

وينادي وينادي

ولاحد يسمع بيه

م الحزن شىء عادي

مكتوب تملي عليه

ويا حزن غالب ليه

ولايوم نسيت ناسك

ويا فرح غايب ليه

وشايلنا من راسك

رقصنا رقصة خوف

من كل شىء مكتوب

والفرح أمتي نشوف

صبحنا شىء مغلوب

مغلوب علي كل باب

مكتوب علينا عذاب

بعد العذاب نلقاه

فرحة بقلم كداب

في حياتنا كام رقاصة

تشبة خيوط النور

تكفرنا ليها ثقافة

ودفاعنا عنها زور

تابت صحيح تابت

وأحنا الي بينا شرور

ولاعمرها تابت

بقلم ضعيف مكسور

---

📅 2009

✍️ إمام سليم إمام

الأصل واحد

مدام قلوبنا متجمّعة

على حلم واحد

ساكن بين الضلوع.

والحزن عايش،

والعيون متشوّقة

لنور يرجع

للأمل ضيّ الشموع.

---

أنتَ... أنا...

دا شيء أكيد.

أنتَ الأمل والبسمتين،

وعشان تملي خطوتك

سابقة الزمن بخطوتين.

وعيونك دايمًا

تشوف المستحيل.

فكرة... وقلم...

وحاجات كتير متبعترة

وسط الزحام،

واجب عليك تضمها

لحُضن الأمل.

---

ممنوع تشوف نفسك في المرايا

وهيّا بتندبح،

ممنوع تعيش مستني صوت

في العتمة يقتل خطوتك.

مؤمن بأن العتمة

من فعل القدر،

عايز يعيش عالة

على كل البشر.

---

إياك تخاف،

نورك ظلام

للي ضاع منه البصر.

إياك تتوه زيهم،

أو حتى تسأل عنهم،

لو حاولوا يوم يهربوا

ويعودوا تاني بالزمن.

---

وبكل الطرق

حسبوا نفسهم

على ناس رحلوا من زمان عنّا.

كان في يوم حلمهم

فارس ينور سجنهم،

اتقال عليه بعد كده:

فاسد... وخرب أرضها.

---

إياك تخاف ظلم البشر،

واكسر قيود الخوف

وحرر أرضها.

انشر شعاع النور

ينور حلمها،

حرر دموع الفرح

من سجنها.

---

اكتب كتاب العدل من تاني،

ارسم وجوه الحب من تاني،

افتح طريق الحق من تاني،

ابدر بذور الهمة من تاني.

رجّع عيون الخلق للسما،

واياك تخاف ظلم البشر.

---

دا أنتَ... أنا...

والأصل واحد،

مدام قلوبنا اتجمّعت

على حبها.

---

📅 12 / 10 / 2010 – 7:30 صباحًا

✍️ أمام سليم أمام

الاسم في البطاقة،

والمهنة والتاريخ،

والشكل واللباقة...

تشوفهم تقول: "دا شيخ".

---

عاقل؟ صحيح مجنون؟

واقع... ساعات موزون.

فاتح في قلبه تكية،

لونه أساس كذا لون.

---

شايل سكات الخوف،

وعَ البُكا محدوف.

تسبق عيونه الزمن،

لطريق أكيد معروف.

---

حاجب حدود الراس،

واقف رئيس حُرّاس.

كافر بكل حدوده،

مؤمن برب الكاس.

---

مولود بشر الأرض،

شيطان يؤدي الفرض.

ساعة شرود العقل،

يبدأ قوام العرض.

---

تتر البداية عادي،

رقصة بنغم هادي.

الفرحة بنت جريئة،

والحزن مش راضي.

---

والضحك في الممنوع،

ساعة صلاة الجوع.

تنام على كتفه لحظة،

تتبسم الضلوع.

---

يتوه في أنغامها،

ويحب آلامها.

لما تعيش وتموت،

وسكاتها هازمها.

---

تجرح في قلبه مكان،

يتألم الوجدان.

يصرخ بعلو الصوت:

"أنا إنسي مش حيوان!"

---

يموت في لحظة عشق،

ويكون نزوله رشق،

على أرض مفروشة،

بجماجم العشاق.

---

📅 26 / 6 / 2010

✍️ إمام سليم إمام

من يوميات صهيوني مجهول النسب

1 . يوم لم الشمل

2 . يوم الهبشه الكبيره

3 . الله مايعدها أيام

4 . في المينا ..ايلات

#. حوار بين كوهين والقائد

#. اليوم الأسود

5 . أه يانا م المصريين

6 . رساله م الواد شاليط

7 . دول في جيوبنا أوعي تخافو

8 . الوصيه

**********************

1 . يوم لم الشمل

...................

أخيرا اتجمعنا

وصبح لينا كيان

أخيرا اتمطعنا

وصبحنا من الأعيان

أراضي ببلاش ومين

يقدر من المسلمين

يقولنا رايحين فين

أو حتى شارين بكام

يالا يا عذرا يالا يا بذرا

ابني وخرب في فلسطين

ابني عمّاير لكل أصحابك

اقتُل وشرّد مسلمين

وكل شيء بينطق عربي

لازم يرحل في طرفة عين

يالا اكتب قوام بالعبري

هنا تقع إسرائيل

رغما عن كل الحاضرين

---

2 . يوم الهبشة الكبيرة

...........................

كان يوم ولا في الأحلام

محدش فينا أبدا نام

الكل سهران وبيرقص

والعالم كان كله نيام

السكة كانت مفتوحة

والسما مليانة ألوان

اترسمت كدا بالصدفة

من غير سابق أوان

يوميها يا سيدي روحنا لقينا

الدنيا هادية وطراوة

لا في صوت صريخ ولا نملة

ماشية تتمايل كدا في الحارة

قلنا ندخل كدا ونجرب

نضرب كدا أنشالا عمارة

ماهو مفيش أبضاي وفتوة

واقفين حراس للحارة

لعبت معانا وفي لحظة

صبحنا حراس الحارة

والعالم كان كله نيام

ومين فيهم ماكنش معانا

ومجاش يهنّي ويبارك

يوميها بنجاح الهبشة

ومين يوميها مقالشي

أخيرا من تاني رجعنا

نتمشى ونرقص في الحارة

والأرض اترفشت أموات

رجالة أطفال ستات

والعالم كان كله نيام

والسما مليانة ألوان

اترسمت كدا بالصدفة

من غير سابق أوان

---

3 . الله ما يعدها أيام

.......................

بعد دخولنا لقلب الحارة

فرحتنا ما دامتش كتير

كان في صياد في الحارة

واقف وماسك لينا سنارة

يصطاد بيها أرواحنا

لا عرفنا نكمل فرحتنا

ولا يوم فيها ارتحنا

وبقينا نصرخ ونقول:

يارتنا ما دخلناها

ولا جينا ولا شفناها

الله ما يعدها أيام

---

4 . في المينا .. إيلات

( حوار بين كوهين والقائد )

.............................

القائد:

كوهين المخلص دايما لينا

في أوامر تكون ع المينا

اليومين الجايين دول

تاخد بالك من الميه

وتملي فيها تبحلق

ولو شفت أي حركة

غير طبيعية في الميه

أوام تجري تبلغ

إياك يا كوهين تنسى

أو للأوامر يوم تِحلق

في خطر كبير ع المينا

وأي غلطة يا عم كوهين

هيطلع أسافيل أهالينا

كوهين:

تمام يا فندم

علم وينفذ فورا

حط في بطنك بطيخة مصري

القائد:

أنا كده هامشي مطمن

المينا أمانة في إيديك

كوهين:

وأنا قدها وأدود

ومستحيل أي ضفدع

أو حتى ديل قرموط

في الميه قدامي يفوت

---

( اليوم الأسود )

.......................

واقف أبحلق في الميه

بقالي أسبوع

وعنيا من كتر البحلقه

مليانة دموع

طلبت من القائد يديني أجازه

صرخ وقال مفيش أجازه

المينا في حالة تهديد

وأنت هنا مش لوحدك

ما زميلك أهم واقفين

لا في حد منهم اشتكى

ولا رمش بطرف العين

وبعدين أنا معينك

يا كوهين ريس ليهم

فإزاي يا كوهين تمشي؟

...

استنيت حبة كده

لحد ما غاب عن عيني

وقلت لنفسي يا واد يا كوهين

سيبك منه واخلع إنت

أنشالا يا كوهين تخرب

أنا ممكن كدا انشل

أو أتعمي من البحلقه

وحبيبتي وحشاني وهموت أشوفها

وعلى بعد كام ميل من المينا

سمعت أنا صوت رهيب

صوت المينا

نسفوه المصريين

في لحظة وفي طرفة عين

قلت أنا حي

اتحرق القائد والمينا

بس أنا حي

ألحق بقى أروح للمزة

أنا جاااي

---

5 . آه يانا من المصريين

..............................

قبل الساعة 2

كنت فين يا كوهين؟

كنت برقص ع الدبابة

وحبيبتي سايقة الخيابة

بتقول لي خايفة يا كوهين

قال إيه من المصريين

وبتقول لي خش الدبابة

ليخلونا يا خويا طحين

بعد الساعة 2

كنت فين يا كوهين؟

كنت بولول زي الحريم

مرعوب من المصريين

مش لاقي أمي ولا أبويا

ومنين أجيبهم منين؟

من يوم وصولي للدنيا

ماعرفش سكتهم فين

طب أصرخ وأقول يا إيه؟

آه يانا من المصريين

بعد علقة المصريين

عملت إيه يا عم كوهين؟

أنا قلت أعمل مسكين

وأطاطي للمصريين

وإن كانوا رجعوا سينا

فكفاية حضن فلسطين

مع إنه ملهلب حبة

لكن أرحم من المصريين

---

6 . رسالة من الواد شاليط

..................................

عم كوهين صاحبي الغالي

أخبارك إيه؟

مرسالك جالي

بص يا سيدي

أنا لسه على وعدي معاك

هفضل هنا لحد يا سيدي

ما أخليها خراب وهلاك

هما بيقولوا هيبادلوني

بألف غنماية يا سيدي

ولحد دا ما يحصل

هنكون دبحنا اتنين يا تلاتة

فوق الألفين

أنا مفهمهم يا عم كوهين

إني حاجة كبيرة قوي

وإني عالم ذرات

وبلدي ممكن تدفع فيا

الدهب والمليارات

وعشان كدا ما تخفش عليا

ولا حتى تقلق

وأطمن قوي يا كبير

وزني زاد الضعفين

وبدل الفوطة جابولي اتنين

وكمان بشيل حديد

وبلعب شطرنج معاهم

دا أنا حتى جندت منهم

واحد أهبل من وراهم

بيجبلي كل أخبارهم

في النهاية يا عم كوهين

بوصيك بالقطتين

أرجوك تاخد بالك منهم

وتحميهم وتأكلهم

وكل يوم الصبح يا سيدي

تدبح علشانهم جملين

---

7 . دول في جيوبنا أوعي تخافوا

.........................................

قعدت وفتحت التلفزيون

وقدامي عصير الليمون

ورجلي في وش الشاشة

قال إيه حاكم عربي

منشكح بيقول ببشاشة:

"دولتنا تقدر ترد

على أي هجوم محتمل

بكل سهولة وسلاسة"

بعديها جه في الأخبار

إن المذكور "فشار"

كان الصبح بيشرب شاي

ويا أبو عزة

وأبو غازي

والمدعو أبو رياض

واتخانقوا على قالب السكر

اللي جابه رئيسنا عذرا

للمدعو "فشار" من بدري

وقالوا في نهاية الخبر

إن ما فيش أي حاكم

يقدر ينطق قبل ما عذرا

حامي بلادنا الهمام

يبعت له نص الكلام

ومعاه قالب سكر

---

8 . الوصية

................

علشان نعيش

لازم يتفرقوا

وكل المشاكل اللي بينهم

لازم تكبر

والكبير اللي فيهم

لازم يصغر

هنشجع الأقليات

في كل مكان في بلادهم

يطالبوا دايما بحقوقهم

وإقامة دولة ليهم

والدولة تصبح اتنين

وما فيش مانع يبقوا تلاتة

طوائف على كل لون

والفرقة ليهم عادة

.......

.

كتبها : امام سليم امام

السبت : 5 يونيو 2010

يارب آمين

صليت العشا وقعدت أذكر الرحمن

وأقول: ياربي زدني كمان وكمان

خليني دايمًا معاك وفي صحبتك

خليني دايمًا أشكر جمال نعمتك

ربي العزيز الصمد

مش طالب أكون غير

عبد على طريقك يسير

ومنساش ياربي في يوم

نفسي وأقول مهموم

وإزاي ياربي يكون؟

وأنت خليتني أكون

شخصية ليها كيان

حاسة بهدوء وأمان

بتقول بعلو الصوت:

أنا ليا رب كبير

يسمع في بطن الحوت

دعاء عبده الفقير

يارب أحفظني

من شري ومن نفسي

ويارب ارزقني

توبة في كل أذان

واغفر لي يا رحمن

ذلة قلم ولسان

وألهمني يا منان

أدعي بقلبي وأعيش

على فطرة الإنسان

واغفر لأبويا وأمي

ولكل أخواتي

وكل من في قلبه

حب يقول: الله

يارب آمين

وفي خيرك عايشين

تعطينا من جودك

وفي الجنة من نورك

في صحبة رسولٍ آمين

يارب آمين

يارب آمين

......

1 / 6 / 2010

✍️ إمام سليم إمام

الولد والبنت (معًا):

إحنا أطفال وصغيرين،

إحنا أطفال حلوين طعميـن.

لا بنعيط ولا بنوأوا،

زي العصافير كده بنزأ زأ.

ابتسامتنا مالية عيونا،

والفرحة بتجري في قلوبنا.

بنحب الدنيا وبنغني...

---

الولد والبنت (معًا):

طب ليه يا بابا بتسبنا،

وتسافر وتروح لبعيد؟

واحشتنا قوي يا حببنا،

مش هتيجي بقى في العيد؟

---

الولد والبنت (معًا):

تعال يا بابا تعال هنا،

تعالِ بجد... وحشتنا.

ليه يا بابا ليه ما تجيش،

معانا تقعد وتعيش؟

تلعب معانا وتشيلنا،

زي عمو وخالتو وتيتة.

---

الولد والبنت (معًا):

ماما بتحبك يا بابا،

وتملي نشوفها بتعيط.

ماسكة صورتك ليل ونهار،

وبتحكيلنا دايمًا عنك.

وتقولنا: "بابا يا ولاد،

عايزكم تبقوا شطار".

وبتسألنا: "هتطلعوا إيه؟"

---

البنت:

أنا قولتلها يا بابا إني

هبقى صحفية مشهورة.

في الجرنال ليا صورة،

أمسك الفاسد من ودنه

وأخليه للناس عبرة.

---

الولد:

وأنا نفسي أطلع دكتور،

أكشف على الناس بالدور.

وأخفف من آلامهم...

---

الولد والبنت (معًا):

هنستناك يا بابا تجيلنا،

وفي حضنك الدافي تشيلنا.

الفلوس مش هتعوضنا،

حضنك الدافي يا حببنا.

---

📍 شارع شريف – وسط البلد

📅 يناير 2010

✍️ إمام سليم إمام

لما القمر يحبك ويتمناك

تبقى ليه جار في السما

وأنت بغبوتك ترفضه

قال إيه خايف تقع!

يبقى ليه بعد كده

تيجي وتحلم بالنجوم؟

خليك لدود الأرض ياكلك

وعن الأحلام ياريت تصوم

---

واوعي تاني تبص فوق

لحسن تفوق

وتعرف إنك خلاص

صبحت ميت

عايش في توهّا ولخبطيشن

وكل اللي فات من عمرك صابه الضياع

لا عرفت تخطف أي خطوة

توصلك على بر حلمك

ولا عرفت تهرب لحظة من الأوجاع

وفات عليك معاد البدل والحلم ضاع

---

وكنت فاكر بركونك للأرض

هتعيش في أمان

أديك ندمت على كل اللي فات

والقمر اللي حبك في يوم

غيرك سبق ليه

وطلع عشانه ميت سما

هل كنت فاكر إنه هيبكي عليك ويستناك

لحد ما تفكر توقع أول قرار؟

---

سلّملي بقى على كل شيء

خلاك تخاف

إنك تطير في الهوا

وتتشعلق بحلمك وتمسكه

وتخاطر لو مرة وحيدة

في عمرك الماضي الطويل

مش برضه إنت اللي اخترت

تعيش جبان؟

ولا هتقول لي: "ما كانش بإيدي الاختيار"

---

خلاص يا حلو... الحلم مات

يلا شوفلك حلم تاني من سكات

يكون على قد حالك

وبلاش تلعن الليل والنهار وتقول زهقت

ده الوقت مش وقت انتحار

خليك حمار الحبة دول

وعيش حلاوة الانتظار

يمكن في يوم تفوق كده

وتعرف:

إن السعادة يا دوب قرار

والفرصة لو تفوتك يوم

محتمل...

ما يكونش ليك بعدها أي اختيار

---

✍️ إمام سليم إمام 

سؤال رفيع

هو ليه الواحد قلبه قاسي عَ اللي ليه ؟

يأمر وينهي فيهم .. وما يقبلشي بكلمة "ليه"

تملي عاملهم دوشة وروشة

ومعاهم قاسي وخنِّيق

وبره بيته .. يسلام!

إنسان بريء

هادي جدًا .. محترم

عاقل .. وعمره ما قال "ليه"

واكل جزمتين في بقه وساكت

وكرامته بره بيته

اتوفّت وماتت

مع إن جوا بيته:

أكتر حد بيخاف عليه

أكتر حد عارف عيوبه

وعمره ما عاب عليه

ولا إحنا يا جنس الرجال

الواحد مننا …

لما يلاقي قلب طيب

يخاف عليه؟

يعمله مداس

وكل يوم الصبح … يدوس عليه؟

ولما يرجع لبيته آخر النهار … يسب فيه

ولما يجي عليه الليل …

يجري قوام يصالحه … ويبوس إيديه

---

✍️ إمام سليم إمام

صباح13/5/2010

مسجون فـ خوفي

ونفسي أهرب منها،

ألفّ فـ الشوارع

أدور على قلب طيّب

ما يكونشي فيه طَبعها.

أبويا سابني ليها ليه؟

عشان بتحبني؟

يمكن تكون بتحبني،

لكن قسوته عليها

خلّتها تشدني

لطريق مفروش بخوف.

عشان بتشوف فيّا

شكل أبويا وجبهته،

ورغبته إنه يطير

يسرق الفرحة منها

فـ لحظة ما تكون

على بعد ميل.

يتخايل بيها

وهِيّا بتسأله: "كنت فين؟"

مع إن أبويا كان يحب

يخنق العصافير،

لكن أمي صَبَحت

فـ نظره حاجة أقوى شوية منهم.

فـ إزاي يكسب منها المعركة

بـدون قتال؟

مافيش غير حل واحد،

سبقت أمي بيه وطلبته.

وأديني دلوقتي معاها

بـدفع تمن غلطة،

بـدفع تمن قسوته،

وبـشرب المُر بداله.

وصَبَحت أنا الجاني والضحية.

ورغم كل اللي بتعمله أمي فيّا،

هَاحبها، وهَاحب أبويا،

بس تشيل لقب "الطفل الضائع"

ده عن جبهتي،

وتمنحني مكانه

اسم بديل…

يشبه كده:

ابني الجميل.

---

 ✍️ إمام سليم إمام

 – 13/5/2010

بدون فزلكه وكلام كبير

وشعارات رنانه للتغيير

أنا عايز ريس جديد

قلبه من حديد

تكون دماغه عاليه

وبيطلع بالمفيد

مش نغه ولا بلبانه

ولا مسنود من باباه

لو يوم جاتله الحاله

يقول هاتولي ماماه

ماماه مين ياعمنا

دي بلادنا دي بتاعتنا

مش ورث أبوك ياخويا

كفايه سودت عيشتنا

خليتها ياخويا بليله

في الشارع متبعتره

روح كده بلا نيله

شكلك صبح مسخره

نص الشعب في الشارع

بيلطم من السياسات

والفقر ليهم أمنيه

وأملهم فيك ماااااات

يالا لملم ألاتيشك

وشفولكو عزبه تانيه

قطعت أكل عيشك

مش هتقعد فيها ثانيه

البلد دي بتاعتنا

وهنحكمها بإدينا

مراح زمن البطيخ

سلملي بقي علي نينه

أنا المواطن اللي

في أيده القرار

ومنتش وصي عني

بطلت أكون حمار

وهقلبهالك ظلمه

وكرسي في الكلوب

دا أنا دماغي صرمه

وهتاكلها لو تحب

خلاص أنا جبت أخري

نقلبها حرب أهليه

وسلملي بقي علي باباه

وعلي الديمقراطيه

أنا عايز ريس بجد

يخاف يناس عليا

أقابله في أي يوم

وأقوله علي بيا

مش عايز أنا حراميه

شغلتهم مؤتمرات

في البدله مدفيين

وكل اللي عليهم هات

وأنا أجبلكم منين

ياولاد التيت تيت

أنا كنت رايح فين

والله ياربي نسيت

ياريس يالي هاتيجي

أرجوك تسمع كلامي

حاسب م اللي حواليك

ليكون فيهم حرامي

متخفي وعامل طيب

وع الحق قلبه حامي

ساعتها هنحاسبك أنتا

ودا آخر كلامي

---

📅 2/5/2010

✍️ إمام سليم إمام

على رصيف الحياة أنا اتولدت

ومن سكات الليل قلبي اترسم

برد ومطر

وبيوت كبيرة من الألم

مفروشة خوف

من جنس غريب

أحقر شوية من الحجر

فتحت إيدي

لجل ما أطول نصيبي

من خير المطر

داسوا عليها بالجزم

وقالوا: نصيبك هناك

وسط أشلاء القمامة

ليه ما دورتش عليه؟

مقبوض عليك

بتهمة: البحث عن البشر

مات البشر... وليه تعيش

مادام قلبك لسه

ما مستوش قسوة حجر؟

ابعد بعيد عننا

منبوذ... ومستحيل

تبقى واحد مننا

---

خلاص عرفت، خلاص زهقت

من اللف...

والشرب من كاس القدر

وإيه أنا أملكه في الدنيا دي

غير ورقة بفرّه

أعمل بيها آخر سيجارة؟

يمكن أنول ضحكة مسمومة

تقرّبني من الحقيقة

وتبعدني عن المجهول

---

إمتى يا ربي... ييجي اليوم؟

الي فيه الغيوم

تسمح للقمر

يفرش نوره ع المكان

وألاعب الحياة دور رفّه

مع إني عارف مين اللي فايز

لكنّي بحلم أشوف الحياة

ولو مرة واحدة

بتتشحتف، ولهوفة، وخايفة

من فصول القدر...

اللي عمره ما حن عليّا يوم

بضحكة...

تنسّيني حبة هموم

وكأن الحزن سهم وخرج

وقلبي علشانه انفطر

---

✍️ إمام سليم إمام 

📖 المنصورة – 25/4/2010

✨ جوا الدرج ✨

--

1

جوا الدرج أحلام كتير مركونه،

أفكار كتير مسجونه.

بتصرخ تنادي في كل يوم:

يا صاحب الدرج، أنا موجودة!

يا ساجن الأحلام، إزاي تعيش؟

وتسيب أحلامك جوا درج مسجونه؟

---

2

جوا الدرج صورة،

على ظهرها اسم وعنوان.

على ظهرها كلام حب كان،

من حبيب فارق من زمان.

الصورة بتبكي عيوني،

والكلام بيصحّي جوايا الحب اللي كان.

والاسم صبح لبنتي،

وليه يا حبيبي اتغيّر العنوان؟

عارف... هافضل أحبك،

مهما يفرق بينا الزمان.

---

3

جوا الدرج حبة كلام،

عني وعن الأيام.

خايف لو يخرجوا في يوم للنور،

الناس تقول: "أحلام!".

أي كلام ملوش فايده،

والأحسن إنه يرجع جوا الدرج،

ومن تاني في هدوء ينام.

---

4

جوا الدرج ورقة وقلم وكتاب،

وألبوم صور لأغلى أصحاب.

وأجندة فيها مواعيد السفر،

ومين فيهم يقدر يخفف عني صوت من العذاب؟

ومين منهم قادر يقربني...

من الأحباب؟

---

5

جوا الدرج حلم كبير،

مسجون بقاله زمان.

إني في يوم أكون إنسان...

أعيش إنسان.

ألاقي الحب في كل مكان،

بيرسم في كل قلب ميت بستان.

بيجمع القلوب في قلب واحد،

ما يعرف غير الحب والإيمان.

---

📍 جزيرة الورد – المنصورة

📅 13 / 4 / 2010 – الساعة 10 ص

✍️ إمام سليم إمام

---

أنتَ أخويا

...

أنتَ أخويا وابن عمي
وابن خالتي وابن خالي
أنتَ ليك حق علينا
أنتَ بجد علينا غالي

والنهارده ليك وبس
النهارده اليوم ده يومك
العب .. افرح .. ابتسم
كلنا جايين نزورك

إياك تخاف .. ده إحنا معاك
وكلنا بنطلب رضاك
ده الرسول وصّى عليك
وأنتَ أخ علينا غالي

لازم تشوف حب وحنان
وتحس دايمًا بالأمان
ولو تطلبنا في يوم … تلاقي
حواليك مليون إنسان

مش كفاية حضن ليك
مش كفاية نبوس إيديك
إحنا لازم نبني ليك
مستقبل .. وبرج عالي

ده أنتَ أخ علينا غالي

.......

✍️ إمام سليم إمام

صباح – 1 / 4 / 2010

"يوم اليتيم"

سِبت القلم يكتب
كتب القلم آلام
قلمي ما يعرف يِكذِب
ويزوّر فـ الأحلام

يمكن يكون بيحب
ويتوه فـ دقّة قلب
لكن كفوف السلب
تخلّي المدد بركان

ثاير ومش عايز
مـن كلامه جوايز
يكسّر مدد فايز
بنصرة الأيّام

شارد فـ حلم بعيد
يرسم مدن بالإيد
مليانة فكر وليد
يُسعِد مـن قلبه تاه

ع السطر مش واقف
م القافية مش خايف
بيغزل بإيده حروف
لكلام بلا مرادف

يطلع ساعات وينزل
وعمره في يوم ما يبعُد
عن طفل عاش معزول
ماسك فـ إيده فرشة

على ناصية شارع شريف
يخطفها منه الزمن
يضحك بصوت مسموع
ويشتريلُه كتاب

مـن مكتبة بتشاوير:
"تعالى يا بني وشوف
الدنيا عندي حروف
أقوى مـن البارود
وأحدّ مـن السيوف

أنا عمري لو يتعدّ
يتعدّ بالألوف
تعالى ما تخافش
مفيش فـ كلامي خوف"

......

✍️ إمام سليم إمام 

حبيبتي المنقبة

أبوها قال خايف عليها من الشباب
وعشان كده ألزمتها لبس النقاب

كلام جميل يا عمنا .. لكن أنا بحبها
وجيت لبابك ألف مرة وطلبتها
وردك كان في كل مرة:
ـ "مفيش بنات عندنا"

طب ليه كده؟!
أما صحيح قلبك حجر
عارف إنها بتحبني، ورغم كده
رافض جوازنا من بعضنا

وكمان منعتني
إني أشوف شكلها
من سنين وأنا أعدي ع شباكها
ألاقيها واقفة متنقبة
حتى عيونها منعتني من أني أشوفهم

منعتها من الخروج
إلا للمسجد .. والدراسة
وبإيدك كنت تاخدها وتشدها
وكأنها طفلة صغيرة تاهت من أهلها

ورغم كده مقدرتش
أمنع نفسي يوم عن حبها
وبكل الطرق قررت إني أوصلها
وعرفت من قريبة ليا بتصلي زيها
إنها بتاخد كورس كمبيوتر
في مكان قريب مننا

جريت عليه .. وقدمت فيه
وحلفت إني لازم أوصلها
لو حتى كان إيه التمن

ولما عرفت إني معاها
وبدرس زيها
فرحت قوي .. والفرحة كانت
شلال كبير نازل من صدرها

وكلمتها .. ورجعنا تاني نعيد حبنا
اللي كان قبل النقاب
والحبس .. وسنين العذاب

وبقينا نيجي قبل معاد الكورس نتقابل
وعلى سلم الحب كنت بقولها:
إزاي حياتي تاهت بعدها؟

وطلبت مرة منها
إني أشوف وجهها
وتخلع نقاب الشوم اللي شوه شكلها

رفضت كتير .. لكنها وافقت
عشان عارفة إني بحبها

طل القمر من بين ظلام الليل الساكن فيه
ضحكت .. وكانت ضحكتها فيها الحياة
قلبي انتفض .. وكل شيء غاب عني .. تاه

مقدرتش أمسك نفسي لحظة وقتها
ولا هي قدرت تمنعني
إني أضمها
جبل الحنين في لحظة
اتفتت على صدرها

صرخت .. وصوتها مغموس في الدموع
"حرام كده .. دا شيء ممنوع"
رديت عليها بقلب محروق موجوع:
"لحد أمتى كل ده؟
قلبي خلاص شبع فراق
قولي لأبوكي يرضى عنا .. حرام كده"

قالت:
"مقدرش تاني أكلمه عنك يا غالي
بقالي سنين بفهمه إنك عايزني
وبرضه يرفض ويقول: إلا دا
وجايبلي شاب بيقول عليه ملتزم
بجد أنا مش عايزة أعيش غير معاك"

بس القدر دايماً يلعب لعبته
ويفرق بين الأحبة بكل الطرق

رديت عليها وقلت:
"لا .. مش هرضي تاني بالفراق
أنا مصدقت إننا
رجعنا تاني لبعضنا
تعالي نهرب من دا القدر
ونشوف قدر يشبه لنا"

٠٠٠٠٠٠٠٠

"قصة خيالية لا تمتّ للواقع بصلة." ✅

كتبها ✍️ إمام سليم إمام

في 23 / 2 / 2010

انفصال

.............

قامت مظاهرة جوايا

والكل طالب الانفصال

وعيوني ما بقتش معايا

وحياتي صبحت شيء محال

رجليا ليه مش شايلاني؟

وسابتني عاجز كدا ع الأرض

وسؤالي يرجع من تاني:

"أنا ليه خسرت الطين والعرض؟"

نصيبي من نفسي بيضيع

ولحمي أصبح شرق وغرب

وشمال جنوب بين خط منيع

يقطع حبال النور في القلب

بيني وبيني ألف صراع

مزروع ببذرة كره وحقد

وولادي أخدوا الجهل شراع

واختاروا صاحب مالوش عهد

حابب يغير شكل الكون

يسرق سكاتي وكل شيء

ما هو عقلي سابني للجنون

ولصوته شاف مليون طريق

سألت عن معنى السكات

وإزاي صبحت مجرد اسم

مدفون في بعض من الأبيات

بتغني مع كراسة رسم

أنا كنت لحظة من الأوقات

سبقت خطاوي النور والشمس

صبحت بحلم باللي فات

وحياتي صبحت كلها "أمس"

بستني يوم فيه الرجوع

لكل حتة من قلبي

ترسم ملامحي بدون دموع

وأشوف بعيني "ابتسامتي"

.............

إمام سليم إمام

أسيوط – 23/2/2010

أُحِبُّكِ أينما كُنتِ،

في قلبي أنتِ ما زِلْتِ.

فلا تَخشي من الآتي،

فما الآتي سوى أنتِ.

فأنتِ الماءُ والمأوَى،

وأنتِ الشمسُ والقمرْ.

وأنتِ المَنُّ والسَّلوَى،

وأنتِ النُّطْقُ في فمي.

فمَن قال لكِ إنِّي،

نسيتُ الليلَ والنَّجوى؟

وأيّامًا قضيناها،

نُداعِبُ العِشقَ أن يَرضى.

بقلبَيْنِ يُصَلينَ،

له في الخَفَي والجَهْرِ،

صلاةً لا يُضاهِيها،

صلاةَ العابِدِ الأتْقَى.

فقلبي لم يُجادِلني،

في يومٍ ويُنْكِرَ العِشقْ.

وكيف لقلبي أن يَنكِر،

فحُبُّكِ له أرضًا؟

إذا ما أنكرهُ يومًا،

فلن يجدْ له أرضَا.

فلا تَخشي من الآنِ،

فما الآنِ سوى أنتِ.

فلن أطلُب من القَدَرِ،

سِوى... حُبُّكِ أنتِ.

يظلُّ في قلبي ما شاء،

إلٰهُ الحُبِّ والعِشْقِ.

فأنا لا أدري ما أفعل،

إذا ما ضِعْتِ أو غِبْتِ.

سِوى أن أقولَ لكِ:

أُحِبُّكِ أينما كُنتِ.

---

✍️ كتبها: إمام سليم إمام

📍 المنصورة – يناير 2010

📰 اليوم السابع