الفلسفة
...
لكي لا أُتَّهم بالفلسفة
وأبقى قفا
لكل إيدٍ مجحفة
لازم أنقلب
وأعمل عبيط
وأقول: مليش
في الفلسفة
وأروح أجيب البردعة
واكتب عليها: إمّعة
دي البِت عايزة المنقلة
والواد عاملي برجله
والمدام عارفة اللي فيها
لكن البعيدة مجرمة
معاندهاش إذ ربما
عايزاني أعمل زي الناس
وفي الشارع ألبس كناس
وأجيب لها الفضة من قلب الدهب
أما أنا …
مش شغلها
علشان كده بقولها:
الدنيا عندي أغنية
أنا اللي هألف لحنها
أما السعادة
بلاقيها في كل حلم جميل
بحققه
لوحتي قصر في الهوا
بس المهم نحلم سوا
من غير زعيق ولا نرفزة
ترضى بكده؟
يا نفترق …
والكلمة دي أنا قدها
ديتها إيه؟
كيلو قوطة
ونص قريش
وربطة فجل
وقفة عيش
وده يبقى إيه؟
يمكن عقاب الفلسفة …
أو حبر ع الورقة انكفأ
........
✍️ إمام سليم إمام
14 أكتوبر 2009
