قال الشهيد
سألت الجموع .. بتهتف لمين؟
لمصر الحبيبة
لبكرة الجميل
لعودة سريعة
لروح الحياة
لحب يجمع عيون العباد
لحضن يطمن قلوب الولاد
لطلة جديدة
لشمس الأصيل
تنور سمانا
ونكون فرحانين
---
قالوا الحقيقة في صوت الجموع
مشاكل عديدة
من فقر لجوع
لحبّة مناصب
وخوف من الرجوع
لقلة قليلة من المسؤولين
في تقسيم غنيمة
اتنهبت سنين
وحطّ عليهم كنيسة وجامع
وسبحة وصليب
في شارع بلادي
واقفين مهزومين
قصاد الحقيقة الأبية العصية
العايشة معانا بطول السنين
"الدين طول عمره مصري .. وأحنا مصريين"
---
وجندي محتار في كل اتجاه
بيسمع في صوت بيحاول ينساه
الشعب يريد إسقاط الحياة
وشباب بيهتف للحق وللحياة
بيحلم ببكرة وبسمة يوم جديد
محتاجة لهمة وبصمة كل إيد
---
بينادي:
أخويا .. ارجع تاني فوق
هات إيديك .. وحطّم الفروق
قوم شوف بلدنا خسرت كام شهيد
وواجب علينا نكون شيء مفيد
ونملى وطنّا بالحب وبالأمان
أخويا .. حياتك حياتي .. وكل إيد
هاتبني لبكرة فداءً للشهيد
---
مارس 2011
✍️ إمام سليم إمام
