أنا والكتاب دايمًا صحاب
مقدرش أعيش من غير كتاب.
بفتح كتابي وأعيش معاه،
ويا الكتاب حلوة الحياة.
وأقرا كتير وأعرف كتير،
ما أنا والكتاب دايمًا صحاب،
مقدرش أعيش من غير كتاب.
---
بنروح بعيد وسط الشجر،
نلعب ونفرح بالمطر.
ونغني غنوة لوحدنا،
ما أنا والكتاب دايمًا صحاب،
مقدرش أعيش من غير كتاب.
---
بيقولي كلمة تشدني،
يضحك معايا ويحبني.
ويروح يسافر للقمر،
وأروح معاه.
ما أنا والكتاب دايمًا صحاب،
مقدرش أعيش من غير كتاب.
---
قادر أكون إنسان سعيد،
جوا كتابي كلام مفيد.
يقدر يغير في الحياة،
ويخلي مصر في نور جديد.
ما أنا والكتاب دايمًا صحاب،
مقدرش أعيش من غير كتاب.
---
أنا والكتاب نحلم سوا،
أحلامنا دايمًا ممكنة.
نقدر نعيش أحلى حياة،
بالكلمة نرسم حلمنا،
ونسافر كل الأمكنة.
ما أنا والكتاب دايمًا صحاب،
مقدرش أعيش من غير كتاب.
---
جوا الكتاب في ناس كتير،
أدبا وشعرا وفنانين،
وعلما دايمًا مخلصين
للعلم والخير والحياة.
ما أنا والكتاب دايمًا صحاب،
مقدرش أعيش من غير كتاب.
---
📅 21 / 5 / 2011
✍️ إمام سليم إمام
