.............
لحظة ما تحضن كلمتك
والناس تغني غنوتك
وتقول: ياهوه أنا هنا
ودي حياتي ودا أنا
بيقوم سؤال حواليك يدور:
مين اللي قال إنك حياة؟
متفردة بوجه نظر
فكرك هتقدر بالكلام تبني كل اللي انكسر؟
ملايين حروف مترتبة
مقتولة بسيف الحقيقة المرعبة
مدفونة بين طيات كتاب فوق الرفوف
كانت نهاية رحلته من سنين
كانت حروفه بتزاحم إيدين البنايين
وبتكتب معاهم قصة وطن
صبح تايه وسط السطور
المقيدة بحق القلم إنه يقول
حتى لو كانت قوالته بدون دليل
حتى لو كانت حروفه بإيد عميل
تاه الوطن وسط الحروف
والكل عايش في الضباب
وبيضحك على نور عينيه
وبيطلب حياة بدون حياة
طلب مكتوب بضعف القلم
طلب مكسوف من الحياة
والدنيا بتهتف في كل شيء:
مفيش حياة بدون تمن
عايز تعيش؟
راسك لفوق
سيب القلم واقطع بإيدك
كل الرؤوس اللي أخدت الشيطان دليل لظلمها
حتى لو كان التمن هو الحياة
هتعيش بطل في أي وقت من الزمن
وسيرتك هتكون في محراب الحقيقة
ملاذ لكل طالب للحياة بدون ندم
هتعيش شهيد ...!؟
كلام عجيب يا ما انكتب
في لحظة غضب
هاتف على لسان الشيطان
كتبه القلم
لكني حابب أعيش بدون
أكتب بدون
أفرح بدون
أحزن بدون
أكتب بدون قلم يسرق من روحي سكاتها وهمسها
وبكل خوف يقوم يكسر في الأمل
أفرح بدون ندم على قلب
كنت سبب في حزنه وشدته
أحزن بدون ألم يخرج من بين ضلوعي
ويحرق حياة ممكنة بضعف القلم
وبدون ... بدون ...
هتكون حياتي وسكتي
وأيه يكون من دا السؤال
مهما يدور غير العدم
هكتب حروفي وأضمها
للحضن اللي ياما حاربت عشانه بصمتها
وأرسم أمل هايعيش في يوم
مهما كان ضعف القلم
.............
✍️ إمام سليم إمام
2/12/2010
