من بعد سنين
من التمكين
والرسم
والتهليل
والتزيين
خرج الظالم
بوجه حزين
لأول مرة
نحس إنه
حَمل مسكين
اتلمّت عليه
سيوف سكاكين
ما يهمهاش
جيوش حطّين
اللي بتنزف
بقالها سنين
من جرح ملّ من الألم
مدفون بمقابر الندم
بيدندن كل لحظة أنين
وقلوبنا مش سامعين
غير صوت حقير الطامعين
بيدندن غنوة الملاعين
"- إعدام الظالم مكسبين
مكسب لينا
ولأعادينا
وهيحصل إيه
لو مات الظالم
على إيدين أعادينا - "
---
أما صحيح ملاعين!
وتقولوا لأ فاهمين؟
أنتم ولا فاهمين
ولا عايزين
غير الخراب لينا؟
أرجوكم تبعدوا
بغنوتكم عن أراضينا
إعدام الظلم
لازم يكون على إدينا
قبل ما يسرق
الحلم الباقي لينا
---
إعدام الذل
هيشفي جروح ملايين
ويمحي من توبنا ذنوب
كان هو السبب فيها
بقاله سنين عايش
كما الأموات
بيتنفس دمنا
زي الجنين
من غير ما يسأل
الدم جاي منين؟
---
وفي كل صباح
يأمر رجاله
يرسموا صورته
ويلونوها
ببياض يسرقوه م العين
وأحنا بنرتجف من الخوف
بنكدب نفسنا من سنين وسنين
هو بياض الصورة شكله حزين؟
---
الخوف هيموت النهارده
أو حتى بعد يومين
على إيد شريفة
لا تعرف غش
ولا تلوين
تقدر تداوي الجرح
وتلملم قلوب تايهين
وتوقف عدو طمعان
يعرف مكانه فين
تقدر تلجم وتخرس
فرقة الملاعين
أصحاب غنوة:
"إعدام الظالم مكسبين"
......
✍️ إمام سليم إمام
