هي ثورة قومنا بيها
ضد كل المفسدين
ابتسامة فجر طالعة
وسط أشواك الأنين
ميلاد جديد لأقوى أمه
كانت غايبة من سنين
مصر يا شجرة حياتنا
إحنا أوراق الربيع
مهما طال ليل سكتنا
إحنا حصنك المنيع
قادرين نكون في أي وقت
بركان دمار على كل خاين
والمصري قالها: "أنا جد فُقت"
وكل شيء فداكي هاين
ولا يوم يا مصر هاكون أسير
لظلم ظالم مهما كان
الكل بان يا مصر بان
وعرفنا الخاين والجبان
ومهما قالوا علينا إحنا
حلمنا هو الأمان
ظلم البشر عارفين مصيره
والحق بان.. الحق بان
هتعيشي يا مصر
هتعيشي حرة
وكل خاين ليكي بره
مالوش مكان وسطنا
دا في كل حارة ألف ثاير
على أي حد يخون يا مصر
وكل شيء فداكي هاين
وبكره جاي بألف نصر
أوعي تنسي يا مصر.. أوعي
دم ابنك الشهيد
اللي ضحى يوم عشانك
أوعي تنسي الوليد
اللي كان حارس أمانك
وقت ما باع الخسيس
مصر أغلى من الأسامي
والمعاني والكلام
مصر قادرة تكون بداية
ليوم جديد كله سلام
ابتسامة مصر غالية
أغلى من كل الحياة
يا حبيبة عمري.. لسه
الحياة طالبة حياة
البداية بكره.. أيوه
البداية لكل شيء
كان زمان في حياتنا غنوة
حلمنا شاف الطريق
كان سنين تايه حزين
بيسأل يا ناس طريقي فين؟
حوشوا عني المفسدين
افتحوا ليا الطريق
عايز الحق نور جديد
سيبوا ولادي سيبوهم
يرسموا ليا الطريق
ليه بشدة بتحوشوهم؟
دول بداية لنور جديد
ألف سلامة يا مصر ليكي
بكره أحسن من اللي فات
والحياة يا مصر فيكي
هتكون أمان.. الظلم مات
يا مصر قادرة والله قادرة
تخطي أي مستحيل
وابتسامتك يا مصر واجب
نعدي بيها لألف جيل
واقفين يا مصر في كل شارع
نحمي ظهرك من الخسيس
اللي خان واجب أمانك
اللي باعك بالرخيص
واقفين يا مصر في إيدينا قوة
عمرها آلاف سنين
من النهاردة بكره أحلى
وشبابك فتحوا الطريق
لكل خير.. يا مصر بكره
ابتسامتك نور كبير
أقوى من كل الصعاب
ابتسامتك يا مصر حرة
تراث قديم في توب شباب
---
✍️ كتبها: إمام سليم إمام
📅 يناير 2011
عاشت الثورة المصرية
