✍️ شنطة رحيل
تسوي إيه الدنيا لمّا
تنتهي بشنطة رحيل؟
ممنوع يكون فيها غنوة
تهزم الليل الطويل
مليانة حيرة ومعنى باهت
لعمر عاش يقتل سنين
كانت بياض الصورة فيها
أكبر دليل على معنى خير
دارت خطاوي الخوف تدنّس
كل شيء فيها جميل
صبحت أيادي الليل تدمّر
لحد ما تاه الدليل
والصورة راحت مع اللي راح
مع كل معنى كان يوم جميل
---
ممنوع يا راحل من الحياة
حفنة تراب تساوي إيه؟
شمس الأصيل تشوفها ليه؟
شارع بيدن بالأمان
ممنوع عليك تحضن أمانه
وجرس كنيسة مليان حنان
تقدر تقولي فين مكانه؟
---
فرحة بلادي وحزنها
حاجات كتير خسرتها
ماتت معاك يوم الرحيل
ملهاش مكان وسط الظلام
والظلم المرسوم ع الجبين
عاشت أيادي الناس يا راحل
ترسم حياة في كل يوم
وتقول حكاية لكل جيل
عن حد باع حضن الوطن
واشترى شنطة رحيل
---
📖 فبراير 2011
✍️ إمام سليم إمام
