اليوم دا يوم الزينة
والشمس واخدة قرار
تضحك وتورينا
الصادق... والفشّار.
---
فرعون مش عايز يتلم،
والحق في عصاية موسى.
ينهار مدوّحس يا ولاد،
فرعون مصمّم عَ الكوسة.
---
السحرة سجدوا لله،
والحق واضح للناس.
فرعون لا يمكن يتلم،
دا الشعب لجنابه مداس.
---
فرعون بيموت ويعيش،
واخد حصانه من النار.
واللي يحب يعيش
بيطاطي للسمسار.
يدفع من دمه حياة
للقائد المغوار،
ما يقولشي أمته وليه...
فرعون باباه في الدار.
---
أوقات كتير بنخاف
من العزيز الجبّار،
اللي مرابط عَ الكرسي...
يا ليل طويل مالوش نهار.
---
هي الحكاية طويلة،
يا شعب يا صبّار.
ليه الأماني كبيرة،
والخطوة فوق النار؟
---
دستور بلدنا ياهو،
سايبينه للأقدار.
والحق لسه حزين،
مستني أي نهار.
وجعتوا قلوبنا يا ناس،
الحق ليه محتار؟
---
أبو دقن عيّره حزين
عَ الشهيد المحتاس.
عمال يخبط... ها يبيّض،
ويدوق الكرسي يا ناس.
شباب الثورة عميل،
وجنابه حامي الدار،
ساب القرآن ياهو،
وبيقرأ في الأخبار.
---
ينهار مدوّحس يا ولاد،
شعبولا جاي بحمار.
ساب العربية وقال:
الكرسي طعمه نار.
واللي هينافق هيلاقي
تورتاية ست أدوار.
---
طنطاوي البواب
قافل بيبان الدار،
والشعب كله وراه
بيجري بالمشوار.
ودي جمعة الكشري،
ودي جمعة الكفيار.
شطبنا ثورة خلاص،
إحنا آسفين يا نهار.
---
مسجون في خوفي يا ناس،
ارحمنا يا غفّار.
ما تقوللي نكتة يا خال،
فرعون لابد في الدار.
---
📅 4 / 8 / 2011 – أسيوط
✍️ إمام سليم إمام
