رحيل

الحُزن دايس عَ القلوب

وفِنُصّ طريقها بيجلدها

والحِيرة مرسومة بيبان

مقفولة.. مين يحاسبها؟

..

نشكي لمين الحال يا خال؟

والكُل واقف يتوضّى

مِن بير جراح مليان أهوال

والحُزن زاد قوي وعدّى

..

نقدر نقول للدنيا كتير

وهي قادرة تسمعنا

في وقت ما تتوه المشاوير

بس الإجابة بدون معنى

ومهما ندفع فيها كتير

هي الحياة دايمًا بايعة

..

نِعشقها بجنون تقتلنا

ونِعزّها بقسوة تهينّا

أمانيها كدّابة وباطلة

وزينتها زي السيف قاتلة

تضحك علينا وتخدعنا

ونحبها بكل غباوة

..

الدنيا أكبر أكذوبة

أبونا فيها قضى عقوبة

ولو هتشغل قلبك بيها

هتنسى الحقيقة المكتوبة

وتلاقي نفسك تاه وضاع

بعد فوات وقت التوبة

..

بنيجي الدنيا بطلوع الروح

وبكل سهولة بنسيبها

والروح لمّا تحب تروح

ربّك كريم ما يعذّبها

..

الإسم على أرضها عايشين

وحياتنا كلمة بتتغنّى

مرّة في ميلاد.. وكثير في رحيل

وليه بنفضل نستنى؟

خلي الميلاد قرار لرحيل

يا قلبي افرح واتهنّى

فوق التراب مفيش أفراح

تحت التراب في الجنّة

..

إرمي الحياة من قلبك.. عيش

وهناخد إيه إلا عملنا؟

وقبل ما تجهز لرحيل

احجز مكانك في الجنّة

لأ.. مش بعيد ولا مستحيل

ربّك خلقها علشانا

---

✍️ إمام سليم إمام 

 2/8/2011 – أسيوط