✍️ الأستاذ
الأستاذ واقف بينظر
وبيكتب في كلام وكلام
مرة يهاجم، مرة يفسر
وبيكدب... والكدب حلال
الأستاذ مش عاجبه الحال
وناوي يألف ميت موّال
قبل ما يسمع تلاقيه فاهم
الأستاذ مفتي الأجيال
---
يسأل مرة وحيده يجاوب
على نفسه من غير أفعال
تستفسر عن سر جنابه
ومنين جايب طولة البال؟
يتحرر من كل كلامه
بسؤال ملضوم بسؤال
الأستاذ بس بيتكلم
والباقي يسمع وينام
---
تيجي تناقش مرة... تسلِّم
على نفسك، تلاقيك دجّال
متخلّف واقف يتكلم
في حضرة عالم أوزان
مش عايز تفهم تتعلم
وهتفضل تلميذ خيبان
---
الأستاذ عايش أستاذ
يتكلم من غير ألوان
ويحفظ نهج الأموات
ويأسّس تلميذ تعبان
بيردد: "التعلب فات
والتعلب سابقه بأجيال"
---
أوزن... أحسب... أجمع... شيل
اسمك؟ سنك؟ هدفك إيه؟
أتخرج وأكون أستاذ
يتكلم... والكل ينام
وإن قام حد يناقش
هرميه... وهقول خيبان
مش واعي سر الحكمة
بيفكّر قبل الأوان
---
✒️ إمام سليم إمام
